الهدف العام:
ترسيخ معنى الاستعانة من خلال سورة الفاتحة.
العناصر:
البسملة والاستعاذة.
توصيل معنى الاستعانة 🙁 إياك نعبد وإياك نستعين ).
الاستعانة بالله في العبادة.
من استودع الله شيئا حفظه.
تحليل العناصر
- البسملة والاستعاذة
اليوم سنكمل سورة الفاتحة, طبعا ربنا أمرنا إننا نستعيذ به قبل قراءة القران من الشيطان الرجيم , لأن الشيطان عاوزنا نبعد عن القران لأنه طريق الهداية لرضا الله والجنة.
بعد ما استعذنا بالله من الشيطان ونجانا الله منه ،نقول بسم الله الرحمن الرحيم, عارفين سورة الفاتحة عاملة زي ايه ؟ عاملة زي فيلا أو بيت إنت محتاج تدخله ضروري جدا علشان السورة فيها حاجات لو فهمناها وعملناها ربنا هيدخلنا الجنة …
طيب إزاي هندخل والباب مقفول ؟ القرآن ده بتاع مين ؟ …بتاع ربنا …يبقى لازم نستأذنه…
طيب نستأذنه إزاي ؟ نقول : بسم الله الرحمن الرحيم
يعني ايه بسم الله الرحمن الرحيم ؟ ( سماع اجابات من الأولاد )
باذن الله و بقوة الله وكمان ( ممكن يارب تسمح لي أفهم كلامك الذي في كتابك )
فاكرين طبعا اننا علشان ننتفع بالقران لازم نقرأ القران ونفهم القران ونعمل بالقران.
- فضل سورة الفاتحة.
كنا قد قلنا أنه من أسماء الفاتحة ( الشافية والكافية وأم القرآن )
سنحكي قصة تعرفنا لماذا سميت سورة الفاتحة بالشافية, القصة : كان بعض الصحابة في سفر فنزلوا بحي من أحياء العرب أو قبيلة من القبائل وفي ليلة لدغ رئيس هذه القبيلة فذهبوا للصحابة وسألوهم أفيكم راقٍ ؟ فقالوا نعم , فخرج رجل من الصحابة وذهب معهم إلى رئيس هذه القبيلة وقرأ على الرجل الملدوغ سورة الفاتحة وكان قد انتشر السم في جسمه فبرأ الرجل بإذن الله تعالى وكأنما نشط من عقال بعير ….
- توصيل معنى الاستعانة : ( إياك نعبد وإياك نستعين )
يعني ايه استعانة ؟ يعني طلب العون من الله
لو أنا هطلب مساعدة من أحد هطلب من واحد يقدر يساعدني ولا واحد ما يقدرش يساعدني ؟
مثلا لو عايز اخف من المرض اطلب من صاحبي إنه يشفيني ولا أطلب من ربنا ؟!
ولو عايز أبقى غني أطلب من الناس فلوس ولا من ربنا ؟!
ولو عايز أبقى قوي أطلب الصحة من زميلي في الفصل ولا من ربنا ؟!
ولو أنا داخل الامتحان أقول أنا هقدر أنجح واطلع الأول علشان أنا ذكي ولا هطلب من ربنا إنه يساعدني ؟
- الاستعانة بالله في العبادة
في أي شيء نستعين بالله ؟ ( سماع الأولاد )
في الأكل والشرب واللعب والامتحانات والحماية من الشيطان.
وأيضا في عبادة ربنا, فالصلاة والصيام وفهم القرآن لازم نطلب من ربنا انه يساعدنا فيهم .
لأن الله هو الذي يساعدنا في اداء العبادة.
لو انا لوحدي هاكسل او انسى اصلي .. أو أتعب وما أقدرش أصوم.
يبقى لازم ادعي ربنا دايما واستعين بيه انه يساعدني على عبادته.
وأستعين بربنا اني لا أكذب واني لا أعصيه.
يعني وأنا أصلي أدعي ربنا وأستعين به .. يا رب ما اكذبش , يا رب اكون مؤدب, يا رب أحافظ على الصلاة دايما.
- من استودع الله شيئا حفظه
في أي شيء نستعين بالله أيضا ؟
في أن يحفظ لي أشيائي وممتلكاتي.
حديث : قال رسول الله صلى الله عليه وسلم :
( من استودع الله شيئا حفظه )
علينا أن نستعين بالله في حفظ البيت عند الخروج منه , والشنطة عند تركها في الفصل ، والحذاء عند تركه في المسجد
- النشاط المنزلي
تلوين حديث : قال رسول الله صلى الله عليه وسلم :
( من استودع الله شيئا حفظه )
الاستعانة بالله في حفظ أبي وأمي وفي حفظ البيت عند الخروج منه , والشنطة عند تركها في الفصل ، والحذاء عند تركه في المسجد ( فأقول : اللهم إني استودعك بيتي فاحفظه لي, اللهم إني أستودعك أبي وأمي فاحفظهما لي ).
